النهارده أستسمحكم أكتب لكم بالعامية المصرية.. عاوز كلامي يوصل لكل مصري بسيط.. ربنا قال في كتابه العزيز: (محمد رسول الله والذين معه أشداء على الكفار رحماء بينهم).. يعني ما ينفعش نعمل نعامة على اليهود ونبلع لهم الزلط وبعد كدة نعمل أسود على العرب والمسلمين ونتمنالهم الغلط ونمسك لهم على الواحدة!.. والله لو عملنا كدة نبقى منافقين.. حتقوللي ما هو همة اللي ضربونا في السودان!.. حقولك هوة يعني ما فيش جزايري انضرب في مصر؟.. طيب يا عم فين المصابين إصابات بجد في السودان؟.. في مصر كان هناك 50 مصاب أكترهم من الجزاير على حسب اللي قالته وزارة الصحة المصرية نفسها.. يوميها اشمعنى قلنا: يا جماعة ده أصله عادي في كل مباريات الكورة بيحصل الكلام ده والمشجعين بيحدفوا بعض بالطوب وبيضربوا بعض.. هوة يعني مشجعين الكورة اللي الواحد منهم يروح الاستاد مخصوص من الفجر ويستنى أكتر من 12 ساعة في وسط 100 ألف ، اللي مزنوق مش لاقي حمام يدخله أو يلاقي الحمامات زحمة واللي يتخانق مع اللي جنبه على الكرسي بتاعه واللي تيجي عليه وقت الصلاة ظهر على عصر على مغرب ومش لاقي يتوضى ويصلي وللا أصله يكون ما بيركعهاش من أساسه والغالبية منهم لسة شباب طايش.. الجمهور اللي زي ده تفتكر عمر أعصابه ما حتفلت منه بعد الماتش؟!.. المهم بعد ماتش مصر والجزاير في مصر شوية شباب من هنا وهناك فلتت أعصابهم واتخانقوا وناس اتعوروا واتعالجوا في المستشفيات قمنا قلنا عادي يا جماعة ياما بيحصل في ماتشات الكورة ماتكبروهاش أمال.. ده حتى لو ماتش بين فريقين في الدوري جوة البلد مش ماتش دولي ولا حاجة ياما بيحصل وييجي حبايبنا البورسعيدية يزعلوا ويكسروا لو المصري اتغلب من الزمالك وللا اللي بيحصل بين جمهور الأهلي والإسماعيلي.. طيب لما احنا كدة عاقلين وبنفهم وعارفين إن ده بيحصل في كل حتة وجمهورية بور سعيد ما سحبتشي سفيرها من مملكة الزمالك ولا أمير الإسماعيلية شتم في قناة الأهلي.. طيب ليه جينا في السودان كام أوتوبيس اتحدفوا بالطوب وعدد قليل جدا اتصابوا ووزير صحتنا نفسه قال هما 11 بس يعني أقل من الجزايريين اللي اتصابوا في القاهرة قمنا بهدلنا الدنيا؟.. عاوزين الصراحة.. لو حكومتنا كانت بعتت مشجعين ولاد بلد على حسابها زي الجزاير ما عملت ما كناش سمعنا عنهم أي حاجة.. بس طبعا حكومتنا خلت كل حاجة بزنس وسبوبة.. اللي معاه يدفع تلات آلاف جنيه تذكرة طيارة رايح جاي ومعاه فلوس زيادة عشان الفندق اللي حينزل فيه في السودان أهلا وسهلا واللي ما معاهوش ما يلزموش.. طيب فيه ولاد بلد مشجعين حقيقيين لو اتخانقوا مع مشجعين حقيقيين زيهم حيقولوا يا عم داحنا كنا بنهزر مع بعض بس.. يقدروا يدفعوا خمس تلاف سفر وإقامة عشان يتفرجوا على ماتش؟!.. اللي قدروا يدفعوا كانوا ناس بهوات مش غاويين بهدلة ومع احترامنا ليهم بس الصراحة أنا كنت حتشل منهم وأنا بتفرج على طريقة تشجيعهم لمنتخبنا!.. كان لازم الأول يروحوا لمعلم حنكش كبير مشجعي غزل المحلة وللا أسطة دعبس رئيس رابطة مشجعي المصري عشان ياخدوا الأول كورس فنون تشجيع قبل ما يسافروا على أم درمان وللا حتى ابن أخت درمان!.. يا عم دول كانوا مستنيين ييجي جون عشان يقفوا ويرفعوا القبعات (البرانيط يعني) ويقولوا (برافو) للفرقة!.. وطول الماتش حاطين ايدهم على خدهم لما لاعيبتنا ناموا على روحهم!.. فهمتوا الفولة.. طبعا الباهوات دول اتخضوا يا عيني من كام طوبة وعلى طول عمك محمد فؤاد اتصل بسي عمرو وقال بقين الكلام اللي ولعوا الدنيا ولما شفنا فيديو محمد باشا فؤاد بعدها وهوة بيكلم عمرو لقيناه لا هدومه مقطعة ولا في نقطة دم.. يا عيني.. يا عم فين فريد شوقي لما سألوه ايه ده انت اتعورت؟ ضحك وقال: لا.. ده دم.. أخويا يا مصري.. وانت يا جزايري.. فوقوا بقة انتو اخوات.. جتكو خيبة لو مشيتو ورا كلام الناس الديليكا تاني.. أشوفكو يوم الماتش.. واللي يغلب حباركلو.. (يمكن اتخانق شوية مع صاحبي الجزايري بس لو حد سألنا بعد الخناقة : ايه ده عورتو بعض؟ حنضحك ونقول: لا يا باشا احنا اخوات ودول بس شوية دم.. أصل والله عندنا دم.. لسة عندنا دم).. والسلامو عليكو!!!!!!!!
إمضاء
الأخ المصري
الاشتراك في:
تعليقات الرسالة (Atom)
أنا معك لازم نكون أخوة وحبايب لكن ده مش يمنع محاسبة من أخطأ ، بما فيه الإعلام الذي روج للكذب وهيج الناس زي اللي ادعوا وجود قتلى جزائريين في مصر وتبين إنه ما فيش حاجة من دي وبرضه نحاسب الإعلام المصري اللي انزلق للشتيمة والمهاترات
ردحذفالسلام عليكم
ردحذفازيك يا دكتور طبعا انا مقتنع بموضوع ان احنا اخوة ومسلمين والكلام اللى حصل كلام صغير من شباب طايش بس برضه احنا شفنا اخواتنا الجزائريين يحملون السكاكين والمطاوى وده ميحصلش فى ماتش كورة حتى لو مفيش حد مات او اتعور كفاية التهديد والارهاب وده مختلف كليا عن مجموعتين من الناس اتقابلوا حدفوا بعض بالطوب .
المهم احنا اخوات فى الاول والاخر ومسلمين يجب ان نرضخ لصوت العقل والدين ويعدى الماتش على خير سواء فوز مصر او الجزائر وان شاء الله مصر تكسب .
اخوك محمد عبد المنعم
أستاذي و صديقي...أنا معاك في كل اللي كتبتة بس على فكرة المشكلة في الماتش اللي فات كانت اللأصابات المعنوية و ليست الجسدية...الأحساس بالمهانة و عدم الأحترام هم أساس المشكلة التي بدئها بعض الرعاع و رعتها الحكومات بغض النظر عن نوع الحكومة و لكنها الممثلة للشعب..يعني لو كان اللي أنضربوا عشر أضعاف بس بعد كدة خرجت الحكومات أيديها في أيدين بعض كان الموضوع أنتهى تماما....و لا أية؟؟؟؟؟و ربنا يستر..
ردحذفالأخوة الأفاضل: بالنسبة للفيديوهات فقد شاهدت بنفسي فيديوهات أخرى تناقلها إخواننا في الجزائر عن مصابين جزائريين تعرضوا للتعذيب وتم حفر اسم لاعب مصر متعب صاحب الهدف في مرمى الجزائر على أجسادهم ووقع ذلك في القاهرة بعد المباراة وقد اتفقنا أنا وشريكي في المدونة على أنه تلك الفيديوهات لا تنفي ولا تثبت وإن ثبتت فالجريمة تخص من قام بها فقط وليس كل الشعب المصري.. فيديو السكاكين أيضا مشكوك فيه لأنه لم يكن يوجد علم جزائري واحد مع هؤلاء المفترض أنهم مشجعين متعصبين.. ومع ذلك إن ثبت أيضا فلا نعمم الاتهام للشعب كله.. المشكلة الحقيقية في رأينا تقع على الإعلام وعلى السياسيين في البلدين ولو ظللنا نتبادل الاتهامات بمن بدأ المشكلة أولا فلن نصل لأي حل وأذكر قول الله تعالى: (فابعثوا حكما من أهله وحكما من أهلها إن يريدا إصلاحا يوفق الله بينهما) وكيف أن سيدنا عمر رضي الله عنه عندما جاءه الحكمان بين الزوجين المتخاصمين يدعيان عدم قدرتهما على الإصلاح فقال لهما: كذبتما.. لو أردتما الإصلاح لوفق الله بينهما.. فكان هذا من فقه سيدنا عمر وفهمه للآية الكريمة.. وبالفعل فقد كان من ادعيا أنهما يصلحان منحازين كل واحد منهما للطرف القريب منه فكانا يصلح أحدهما بطريقة: معلهش يا بنتي أنا عارف إنتي بنت أخويا ومتربية كويس وهوة ما يستاهلش ضفرك بس خليكي انتي العاقلة!.. والآخر يقول مثل ذلك لزوجها فكيف إذن يتم الصلح على هذا النحو الذي يزيد الاستفزاز بين الطرفين؟!
ردحذف